Sasoikoren 2026-2027 ikasturteko programaziorako izen-emate epea ireki dugu

Gaur ireki dugu Sasoikoren 2026-2027 ikasturteko programazioan izena emateko epea. Udako atsedenaldiaren ondoren jarduerari berriz ekiteko proposamen berria da, Bizkaian zahartze aktibo, parte-hartzaile eta gizarte-eragineko eredu batekin dugun konpromisoa berresten duena.

Lan-ibilbidea amaitu eta aktibo jarraitzea aukeratzen duten pertsonei zuzenduta, programa honek gure ingurunean ikasten, harremanak sortzen eta eragin positiboa duten ekimenak bultzatzen jarraitzeko gune ireki bat eskaini nahi du.

Eskaintza berriak iraupen desberdineko formatuak uztartzen ditu, parte-hartzaileen interes eta denbora-aukeretara egokitzeko. Horien guztien bidez, beste behin ere balioan jartzen dugu talentuak eta esperientziak ez dutela erretiroa hartzen; aitzitik, gure inguruneari ekarpena egiten jarraitzeko eraldatzen dira.

Saio laburrak eta tailer praktikoak: kultura, osasuna eta gaikuntza digitala

Gure programazioa irailetik ekainera bitartean garatuko da Bilboko Erronda kaleko gure zentroan. Konpromisorik gabe informatzeko eta parte hartzeko pentsatutako iraupen laburreko hitzaldiak eta saioak biltzen ditu. Atal honetan honako gai hauek jorratuko ditugu: gaurkotasuneko gaiak, kultura-dibulgazioa Hartu Emanak-ekin, ezagutza praktikoa UNED Seniorren eskutik edota ABAOrekin operako entseguetara hurbiltzeko eta bertaratzeko zikloa.

Era berean, pilula formatuko tailer praktikoen bidez, teknologiaren eguneroko erabilerara bideratutako saioak eskaintzen ditugu (mugikorraren erabilera, WhatsApp, lineako bankua edo osasun-karpeta), baita minbiziaren prebentzioa eta ezagutza, edota desinformazioari aurre egiteko eta albiste faltsuak hautematen ikasteko jarraibideak ere, besteak beste.

Taldekako programak eta jarraitutasun-proiektuak

Prestakuntza-ibilbide sakonagoa eta jarraitutasuna bilatzen dutenentzat, hainbat saioko programak eskaintzen ditugu: Erretiroari aurre hartzen (kudeaketa emozionalean eta bizi-proiektu berrietan zentratua), Aitona-amona izatea gaur egun, Teknologia aplikatua tailerrak, Aurrezpena eta finantza-plangintza ikastaroak Kutxabankekin batera, edo Moda eta iraunkortasuna Bilboko Udaleko Gaztegunearekin lankidetzan.

Atal honetan nabarmentzekoa da All Iron – Auzoko Elkarrizketak ekimena; belaunaldi eta jatorri desberdinetako pertsonekin migrazioari, lanari eta kirolari buruzko bizi-esperientziak partekatzeko sortutako gunea, Bizkaiko aniztasuna islatuko duen sorkuntza kolektibo batekin amaituko dena.

Komunitateak bultzatutako doako jarduerak

Parte-hartze aktiboa da Sasoikoren bihotza. Hori dela eta, parte-hartzaileek berek bultzatutako eta emandako doako proposamenen atalari eusten diogu. Hainbat diziplina lantzen dira: zinema-sorkuntza (film labur bat eginez), antzerki-inprobisazioa, idazketa sortzailea, poesia, auto-ezagutza, ongizatea eta erlaxazioa, mugimendua eta dantza, edota hezkuntza-boluntariotza.

Informazioa eta izen-emateak

Izen-emate epea irailaren 21era arte egongo da zabalik. Interesa duten pertsonek jarduera bakoitzaren informazio zehatza kontsultatu eta matrikula egin dezakete bide hauen bidez:

• Webgunea:https://www.bbk.eus/es/personas-sociedad/sasoiko/
• Aurrez aurre: Sasoiko Zentroa (Erronda kalea z/g, Bilbo)
• Arretarako telefonoa: 944 16 46 46

Ikasturte berri honen hasierarekin batera, gune bizi, hurbil eta partekatu baten aldeko apustua berritzen dugu, ziur baikaude ikasten, parte hartzen eta komunitatea sortzen jarraitzea dela gure bizitzak aberasteko eta gizarte kohesionatuago bat eraikitzeko biderik onena.