Bootcamps programaren edizio berri baten izen-emateak zabaldu ditugu, talentu digitala eta enplegu teknologikoa sustatzeko

Tokiko talentua gaitzeko eta Bizkaiko enpresa teknologikoen benetako beharrei erantzuteko helburuarekin, BBKtik, Lanbide eta The Bridge erakundeekin lankidetzan, Bootcamps programaren deialdi berri bat ireki dugu, gure prestakuntza intentsiboko programa.

2018an martxan jarri zenetik, 700 pertsona baino gehiago prestatu dira programa honen bidez, eta prestakuntza amaitu eta sei hilabetera % 80tik gorako laneratze-tasa lortu du. Zure ibilbide profesionalari norabide berri bat eman nahi badiozu edo merkatuan eskaera handiena duten profiletako batean espezializatu nahi baduzu, 14. edizio honetarako izen-emateak zabalik egongo dira uztailaren 14tik irailaren 25era arte.

Gaur egungo merkatura egokitutako lau espezializazio

12 asteko iraupenarekin, programak ikaskuntza-eredu intentsibo, praktiko eta errealitate profesionalera bideratutakoa eskaintzen du. Aurreko edizioetan bezala, prestakuntza-eskaintzak 4 ikastaro espezializatu ditu:

• Garapena AArekin: ikasi web baten edo web aplikazio baten egitura garatzeko eta sarean hedatzeko beharrezkoak diren ezagutzak. Web Garapena Full Stack ikastaroan, gaur egun eskaera handiena duten teknologiak eta programazio-lengomaiak ikasiko dituzu hutsetik hasita.
• Zibersegurtasuna: espezializatu azpiegitura digitalen babesean eta bereganatu enpresa-inguruneetan zibererasoak prebenitzeko, detektatzeko eta horiei erantzuteko beharrezkoak diren gaitasunak.
• Datuen Zientzia eta AA: ikasi datu-analisirako teknikarik aurreratuenak Python, Machine Learning eta Deep Learning bidez. Adimen artifizialeko ereduak programatzen eta hedatzen ikasiko duzu, enpresaren barruan zein kanpoan erabakiak hartzea errazteko.
• Marketin Digital eta AA: bereganatu Branding, Content Marketing, Posizionamendua, E-Commerce, Paid eta Social Ads eta Growth Hacking-en inguruko ulermen globala, adimen artifiziala integratuz marketin-ekintzen errendimendua hobetzeko.

Ezagutza teknikoez harago, programak etengabeko bilakaeran dagoen ingurune teknologikoan gero eta eskaera handiagoa duten gaitasunak sustatzen ditu, hala nola egokitzeko gaitasuna, etengabeko ikaskuntza eta arazoen ebazpena.

Programa honen eragina zuzenekoa da: maila tekniko altuko prestakuntza zorrotza da, eta ikasle, enpresa eta sektoreko profesionalen arteko ezagutza zein lankidetzarako komunitate eta ekosistema bizi baten ateak irekitzen ditu.

% 100ean diruz lagundutako prestakuntza: sartzeko baldintzak

Enplegua sustatzeko eta gehien behar dutenei sektoreko ateak irekitzeko helburuarekin, prestakuntza hau % 100ean diruz laguntzen dute BBK-k eta Lanbidek Euskal Autonomia Erkidegorako.

Gure Bootcampsetan eskuragarri dauden eta osorik lagunduta dauden plaza horietako bat eskuratu nahi izanez gero, ezinbestekoa da baldintza hauek betetzea:

• Langabezia-egoeran egotea eta Lanbiden erregistratuta egotea.
• 18 urtetik gorakoa izatea.
• Batxilergoko ikasketak edo Goi Mailako Heziketa Ziklo bat amaitu izana.
• Espainian lan egiteko baimena izatea.

Nola eman izena?

Edizio berri honetan izena emateko epea datorren uztailaren 14an hasiko da eta irailaren 25ean amaituko da. Interesatuek programari buruzko informazio guztia kontsultatu dezakete https://bbkbootcamps.thebridge.tech/ honen bidez.

Ez da aldez aurreko esperientzia sakonik behar teknologia-sektorean; hautaketa-prozesuan bereziki baloratuko dira motibazioa eta aldaketa teknologikoetara ikasteko zein egokitzeko potentziala.

Tokiko talentuarekin eta kalitatezko enpleguarekin konpromisoa

Deialdi berri honekin, kalitatezko enplegua, etengabeko prestakuntza, sektore estrategikoetan lan-aukerak sortzea eta tokiko talentuari eustea sustatzeko konpromisoa berresten dugu. Programa honek behin betiko bultzada gisa funtzionatzen du aldaketa profesional baten bila dabiltzanentzat, euren talentua enpresen benetakobeharrekin zuzenean konektatuz eta gune digitaleko gaikuntza Bizkaiaren etorkizuna eraikitzeko benetako tresna bihurtuz.