‘Los Williams’ dokumentala ikusi da BBK Salan

Williams anaiak izan ziren erabateko protagonistak BBK Salan egin zen dokumentalaren emanaldian. Filmak, Bilboko Athletic Clubeko bi jokalarien, euskaldun eta “beltzen”, erretratua eskaintzen du. Kirolariek aurkeztu dute Los Williams, Xabier Sagredo BBK-ko presidentea, Raúl de la Fuente dokumentalaren zuzendaria, Amaia Remirez, Rosaura Romero eta Marias Recarte produktore eta gidoilariak, lantalde teknikoko kide eta lagun eta senide ugarirekin batera.

Los Williams film luze dokumentala da, Williams anaiak protagonista dituena, eta Raúl de la Fuente 3 Goya sariren irabazleak zuzendua. Oraintxe bertan Donostiako Zinemaldian lehiatzen ari da, eta joan den ostiralean izan zen mundu-estreinaldia, euskal zinemari eskainitako ‘Zinemira’ sailaren hasieran.

Iñaki eta Nico Williams bi anaia futbolarien, euskaldun eta “beltzen”, istorioa kontatzen du, eta sustraiekin duten lotura aztertzen du, familia, itxaropena eta jatorrira itzultzea bezalako gaiak jorratuz. Bilboko Athletic Clubeko jokalariek euren bideak banatu zituzten Munduko Futbol Txapelketa bi selekzio ezberdinetan, Ghanan eta Espainian, jokatzea erabaki zutenean.

Kirol-kontakizun liluragarri eta pertsonala da, eta protagonistek beren bizitzak markatu dituzten gatazkei ‒arrazakeria, identitate, anbizio, frustrazio eta deserrotzeari‒ egin behar diete aurre, beren iraganarekin berriz topo egin eta beren etorkizuna proiektatzen duten bitartean.

Iñaki eta Nico Williamsen zuzeneko erretratua da, hiru kontinentetan zehar, beraien bizitzako bi urte erabakigarrienetan zehar, haiengana eta haien ingurune osora sarbide paregabe eta esklusiboarekin. Nazioarteko bi izarren, migratzaile askorentzat erreferenteak diren bi anaien istorio harrigarria, beren burua errekonozitzeko ispilu baten bila bizi direlarik.